Mat 24 | BJR | STEP | Yísufa Yeerusareenni náaquqara amaana maqakiqari ráudamákufanoo moosáa fímarufaqa miná faiqi námu Yeerusaree ámaana maqa óoni maqa minakínaa ámiqira usakara usakáqoona óosana óosana uqafíqee máriqau.

Matthew 24

Yísufa Yeerusaree ámaana maqa rapée íaninnanara qímanniminau.

(Mareekoo 13:1-2; Ruka 21:5-6)

1 Yísufa Yeerusareenni náaquqara amaana maqakiqari ráudamákufanoo moosáa fímarufaqa miná faiqi námu Yeerusaree ámaana maqa óoni maqa minakínaa ámiqira usakara usakáqoona óosana óosana uqafíqee máriqau. 2 Yísufa misá ufa iriséenoo quandáfinoo qímanniminau. Ínnee maa-oonínannai afeeka usakara usakáqoona qáfaidee, ínnee qiní ufa íriaqa. Káqikaaqoo sía uqanna maa-ooniuqá áaku aaku írafa maqee márindee íannoo sía moodáa káqi máriannoo aiqáma qumbaqí áquseefaranoo. Miqí qímasee quqásee moosáa nífiqee finau.

Kásooqaqee kambíqaaninna deedeepa óosanara qímanniminau.

(Mareekoo 13:3-13; Ruka 21:7-19)

3 Yísufa Oorifa áaqanasaa óoru óoqu márifufaqa miná faiqi námu óorureeqa naríaraa márufaqa óoru irámmiriqau. Anée fáasai amaana máqara qíannana yáiree fee miqíannoo fee. Maasá anée qúmira aukuana nána ainainee qáfamásee fee óo Yísufa qúmira aukuana dóo adeedí réenoo fee qianáuree. Maasá maa-aukuanná náqi fee ínaqee maasá miqóo qáfee fee máa̱ márunna aukuanáfa taikáannoo fee qianáuree.

4 Yísufa iriséenoo maaqí qímasee qímanniminau. Ínnee rufíaaqa moó fannoo únna ufa ínni qímannimisee káqi runna mara quqáani. Moómoosa aniréeqa únna qímasee maasá ásauku mundírausa máridee qifáranoo. Faiqí ánaasee moómoosa misá ufa iriséeqa eedóo qímaseeqa fífaqa rarisámeeqee káqitinai ubeekeefáranoo. 6 Ínnee níanaindaraa rakira ufa írifaranoo adeedí ráinnaqoo rákirana tutuqírana ínnee írifaranoo. Mi-ufána iriséeqa síamma qiníara qúmira aukuana dóo áiqarée foo qiaqa. Rákirafa kúqaa maqúsa maqusa kambíaanifeera qídaqa. Maa-marira aukuanáfa sía dauní taikáannoo káqikaaqóo kísaaqasaa máriannoo. 7 Maqúsa maqusa firaa maqusa faqa káqikaa maqusa faqa fíndifinaqa narári narári ífaránoo. Maqúsa maqúsa aandaróo náruannoo maqúsa maqúsa maqá kásiannoo. 8 Mi-ainaináusa mandáukuana óorisaa kai máriannoo kásooqaqee firaafá máriannoo.

9 Miná ánaaqiana faiqí ánaasee maqúsa maqúsa ínniara Yísuna faiqi námu fee qímasaida fídiaqaamannimaqeefaranoo. Aiqáma maa-maqa maaqánaki máriasa ínni nídafirana nimisée ínni kuqánnarifaranoo. 10 Moómoosa miná qáfamásee rufíasee qiní Yísusaki máriasa quqásee minníseefaranoo. Moómoosa narí ueeqée narí ueeqée qifáranoo narí ákooqee narí ákooqee ifáranoo. 11 Faiqí moómoo misá naríara Ánutuna tamummáqara fasiqa fee qímariasa misá fíndifíqa faiqí ánaasee qumáreeqee káqitinai ubeekeefaranoo. 12 Aiqáma ainaina qúmuarirana óosana óosana deedéepirana óosana óosana kambíqafinoo qumbiqéenoo maqa máaqa amana kai máriannoo. Miqí kai inoo moómoosa naríara naríara ámuqusirana minníseeqa quandáfinaqa nari ueeqée narí ueeqée ifáranoo. 13 Yáfa uqannee narí ákoona faiqi uqanna mi-manda aukuanná aiqáma ainaina kambíqainanaki fínnaaqara máseenoo fífi̱ ínanoo taikára kooqi uqanna raqúramisáinafa miná ákoofa Ánutufa qumáreeqeenoo asumu máriranaki quqáannoo. 14 Maa-amiqira fasaasa ufána qiní innaarúna ququsa ufa maqúsa maqusa faiqí ánaasee aiqáma qímannimisaifaqa misá aiqáma irisáifanoo mi-kamúqoo taikára aukuana ániannoo.

Káaqa fídiaqaa ímari mandá ainainara Yeerusaree ámaana máqaki kambíqaaninnanara aaquqímannimaqanau.

(Mareekoo 13:14-23; Ruka 21:20-24)

15 Misá káaqa fídiaqaa ímaria mandá ainaina qumáreeqeeqa Yeerusaree náaquqara amaana maqakina quqásaifaqa Ánutuna tamummáqara fasiqa áuqu Danieerafa mifá minára ákara rinau. Ínnee miná ásaana rúmasee ámiqimmásee íriaqa. Misá mi-mandainainná quqásaifaqa ínnee Yuda máqa máaqaki máriasa quqásee sandámaqaraasamásee áaqana aaqana daráaniaqa. 17 Faiqí maqúsasaa máriasa sía nári máaqaki kéeqafinaqa nári aináina máreefaranoo náriara kai quqásee sandéefaranoo. 18 Áfuqaki máriasa sía nári uqáinara randásee máraaqa. Káqi quqásee sandáaqa. 19 Nímuaqu uqáfaqaa anaaseeuqa faiqi ánaaqi faqaasa faqa misá mi-aukuanná mandáikammifáranoo. Náqimmasee ámiqimmásee sandéefaree. 20 Ínnee maaqí qímasee innaaru qiaqa. Óo Ánutufa sía mi-sandara aukuanáfa amaanasáa kambíqaani. Aaku áukuana faqa sía kambíqaani. 21 Yísufa mi-aukuannára qímanniminoo qinau. Mi-manda aukuanáfa áninna aukuana aupúrarana ínaakufa kambíqaannoo. Óoqai aupúrara aukuana faqa kásooqaqee aupúrara aukuana faqa sía mi-manda aupurarána amana máriannoo, óoreeqánoo máriannoo mifá úriqaránoo firaaqóo rafáaqafusee máriannoo. 22 Dóo Ánutufa mi-manda aupurara aukuanná dóo qúsa máriannoo fee qinau. Sía qusáikinanoo faiqí ánaasee sía amana káqi márifara, aiqáma kúqifara. Ánutufa narí qútaaqamaqoosara narí ufamau fímariasara írinoo, misá sía kúquaqeera qúsa kamu rámannisaannoo.

23 Mi-aukuanná faiqí moó fannoo ínniara maí qáfaaqa Ánutuna ásauku mundírafa miqínni mari mirínni mari fee qínana síamma íriaqa, miná únnaqiannoo. 24 Mi-aukuanná únna nísauku mundirausa faqa únnaqi maría tamummaqira fasiqausa faqa moómoo kambíqeefaranoo. Misáuqaindi áninna aukuana misá qaini qáiniqira ainaina mookíra ainaina náaquqara ainaina áuqamásee uqannífiqasainaqa Ánutuna qutáaqamásee miná ufamáu fímariasa níkaru qímasaana qiníndi kiaqeera miqífaranoo. 25 Yísufa mi-aukuannára mi-unna fasiqáusara maaqí qímasee narí faiqi námu qímanniminau. Ínnee mi-aukuannára óonumafi íriaqa, eeráiriaqa rufíaaqa. Dóo maqee kámu dóo kooroománnimaqaunnana íriaqa.

26 Faiqí moó fannoo maaqí qímaseenoo aní qímaminoo. Ásauku mundírafa aadána máqusa máridanoo, qínana síamma óonu qáfaaqa mínnimasaaqa, únna qídanoo. Faiqí moó fannoo ásauku mundírafa maaqóo kukéeqanoo mári ifoo qínana sía uqanna óonu qáfa. Anée minára únna qiifoo qia. 27 Qinée faiqí nímaaku sía kukéeqasee qúmuanaura. Aakuasáara foora aiqámai innaarúfa rakéemámaree fífaininanoo qinée faiqí nímaaku miqírafa tautúmásee kaifáa qúmuanaura, aiqáma qíqafaaqeera.

28 Aandáu̱ kúqinoo máridanoo áfundifaqa meemóonauqa sía minníseefara kúqaa uqanna dauní uqanna qumuréeqa mi-aandaúna náidaqa.

(Qiní ufa írimariasa máqusa maqusa yátinai fee márifaree sía qiníara randéefaranoo. Qinée qúmidaqa misá márifandinaqoo qeeqá kai irisée tautumasee akooqóo qumurée misá uqéeraanaura.)

Faiqí nímaaku innaarúnaindari qúmuaninnanara qimanniminau.

(Mareekoo 13:24-27; Ruka 21:25-28)

29 Nimoosau maasáu̱ ira áukuana mi-aukuanná taikásainanoo súani qimbáfinanoo asukuna áruannoo. Quqoona faqa asukuna aruamaqáannoo. Fásau aiqáma innaarúnaindari kakasámmifaranoo. Fásau faqa quqoona faqa máruqoo óoqeenáa márirafa rapikamáfuannoo. 30 Mi-kamú qóo qinée qúmuanna kari innaarúnai moo kíra ainaina uqannífiqara ainaina quqásaanaqa miná náaree qáfaifaqa qúmuanaura. Faiqí ánaasee aiqáma maqásaa fasiqa anaasee aiqáma qáfamáseeqa nisaurúsee ikífaafau qímarifaranoo. Mi-karí qinée asuruki qeeqá káaqa qárananamu faqa qeeqá afeeka firaaná faqa qúmuanaqa faiqí ánaasee maqúsa maqusa aiqáma qiní qíqafamásee qiníara rufíasee ikíraqeefaranoo. 31 Mi-karí qinée ukeena firaa qóo fuaqáanaqa qiní qangiroouqa daráanifara, aiqáma maa-maqa maaqána afaaqasása qiní qíku qísauku qinée qutáaqama nímaqaafanausa súqeeqeeqa moodáa saqa qinée márianannai súqu quqéefaranoo.

Saqári amanee ámmuni quandára ufa.

(Mareekoo 13:28-31; Ruka 21:29-33)

32 Yísufa kaifáa minára qímanniminoo qinau. Ínnee faafísa ámmuni márina qáfaaqa sía káqinni ámmunidanoo, narí áukuana nárana áukuana ámmunidanoo. 33 Aiqáma ainaina qinée qímannimiqaunandee faafísa fooqáafa aiqáma ainaina kambíqainaqa dóo qinée kaifáa qúmira áukuana adeedí áfaisaammifoo qiaqa. 34 Maqee mária fasiqa anaaseesá akaqáusa káqi máridaqa aiqáma ainaina qinée qímannimiafannandée kai ínoo kambíqaannoo. 35 Innaarúna faqa innaarúnakinaa ainaina faqa maqá faqa maqásaaqaraa ainaina faqa aiqáma taikáfuannoo. Qiní dóokinaafa sía taikárana amana náaru náaru ánoona uqanna máriannoo miqí kaimminoo máriannoo.

Sía moó fannoo mifá qúmuaninna faasaanara íridanoo.

(Mareekoo 13:32-37; Ruka 17:26-30, 34-36)

36 Qinée qúmira áukuanee qinée qúmira fáasaanee sía uqanna faiqí moó fannoo írimariafanoo. Innaarúnai qangiroouqa faqa Ánutuna ámaaku qinée faqa síamma íridaqa, qiní qíkoofa narí kaimma qinée qúmira aukuanara íridanoo. 37 Qinée faiqí nímaaku qúmira aukuana Nooana áukuana fooqáasa márianaura. 38 Nammári sámu náruna ataufakaí miná maaríqoo faiqí ánaasee qoomáqandauru úqi máriqau. Miqída faiqí ánaasee narámu̱ndée narámu̱ndée idá máriqau. Misá miqímmámaree fubaqa Nooana firaa sipaki kéeqeemaru faasaana misá miqíkaimmímariqau. 39 Misá mána mána ídaqa ámiqi ámiqidaqa márufanoo nammári radíqinoo óoqi misá fatíkaneenoo óoqufinau. Qinée qúmuanna aukuana miqímmifáranoo. Mána mána ímarifaqa káqi qinée tautúmánnimaqaanaura. 40 Mi-karí moodáa afuqaki qaara fasiqa aináinímarifaranoo qinée tautúmmannimaqasee moó qumáree innaarúnai óoru fúanaura moó quqásaanáura. 41 Qaara anaasee saná qaindi rímárifaqa qinée tautúmmánnimaqasee moó qumáree innaarúnai ooru fúanaura moó quqásaanaura. 42 Minára qinée ínni qímannimidaqa. Deedaqída máriaqa. Sía káqi máriaqa. Qinée ínni karaambáiqa qúmira aukuanara sía írimariafanoo. Minára ínnee deedaqiaqéera qídaqa. 43 Úmmuari mari fasiqafa máaqa kooqi atúaseenoo aináina úmmuaramámmaree fídanoo. Máaqa ákoofa mifá úmmuarira aukuana iriséenoofau rakísini. Sía irisáifanoo tautúmmamaqasee dóo úmmuaramámmaree fífinoo. 44 Ínnee minára iriséeqa rakísida máriaqa. Ínnee qiníara faiqí nímaaku sía qúmirarammifoo qímasee mánoo manaa ímarifaqa qinée tautúmásee qúmuanaura.

Andeeqásee aináinasaa rakísimari fasiqanara quandára ufa.

(Ruka 12:41-48)

45 Aináini máriasasaa rakísirafa ámiqira fasiqa óosana maaqímminoo máridanoo. Miná firaafá minára qinoo. Anée qiní aináinira faiqiuqasaa rakísida nárana ainaina andeeqásee ámiqimmásee nimisée rakísi márinaqa qinée moosáa fuanáura. 46 Mi-ainainira fasiqáusasaa rakísirafa narí firaaná ufamau andeeqásee fímarinanoo miná firaafá aní páqurinanoo sía miná áfusaa asaurúannoo asasíannoo. 47 Íriaqa qinée ánoona qímamidaqa mi-fasiqána firaafá miná andeeqárana qáfamáseenoo, narí aiqáma ainainasaa rakísira saika miná ámiannoo. 48 Aináini máriasasaa rakísirafa moo mánda fasiqa narí firaafá moosáa fínanoo mifá minára sía dauní ániannoo fee qímasee narí aináinira faiqi námu sía ámiqimmásee nárana níminoo, misá nárinoo misá kaukaata qímannimaqaidanoo quandáfinanoo naríaraa qoomáqanduquseenoo faiqí akaqáusa náaramáseenoo misáuqa faqa námafinoo afeeka nammari moómoo misá saimbaqa námafidanoo fúrufaramma qáfeenoo. 50 Miqí márinanoo sía rakísi márinna aukuana miná firaafá tautúmmamaqaseenoo aniráma qáfeenoo arusée ateeká ateekámma áqusaannoo. 51 Mi-manda ainainira fasiqáfa qaaraikí máriasa námufaqa mandáinainaki máriannoo. Mifá miqóo misá faqa máridanoo ikífaafau qídaqa nífai riqídaqa márifaranoo. Qinée Yísusa qúmira áukuana miqímminoo máriannoo. Tautúmánnimaqaanaura.